Vijojnë përplasjet mes policisë dhe banorëve te ‘Bregu i Lumit’ në Tiranë. Partia Demokratike shprehet se edhe këtë të mërkurë, fadroma të shumta kanë shkuar në zonë për të prishur shtëpitë e mbetura.
Sipas saj, situata është e tensionuar dhe banorët janë përplasur fizikisht me policinë teksa kundërshtojnë me forcë prishjen e banesave, ndërsa kërkojnë dëmshpërblim financiar sipas çmimit të tregut.
Banorët shprehen se forcat policore janë më të shumta se herën e kaluar, kur policia përdori gaz lotsjellës për të nxjerrë nga shtëpitë banorët që kundërshtojnë prishjen e shtëpive. Policia ditë më parë përdori gaz lotsjellës ndaj banorëve me qëllim që t’i largonte nga shtëpitë e tyre. Ky akt është dënuar ashpër nga Partia Demokratike teksa një veprim të tillë e ka cilësuar si “kriminal”.
