Mimoza Hafizi, ish-deputetja e Partisë Socialiste, njëherësh pedagoge e fizikante, ka reaguar pas vendimin të ministres së Arsimit, Besa Shahini për të pezulluar Rektorin e Universitetit të Tiranës, Mynyr Koni.
Në një postim në Facebook, pedagogia thekson se nuk ka gjetur asnjë vendim të argumentuar për arsyet që e çuan ministren e Arsimit të pezullojë rektorin Koni.
“Kryeministri kërcënon prej muajsh rektorin e Universitetit të Tiranës, kurse sot ministrja e arsimit e paska pezulluar. Jam njëra nga pedagoget e këtij universiteti. Kam një histori të gjatë betejash për të mbrojtur vlerat e tij, si brenda mjedisit akademik e shkencor, ashtu edhe në politikë e në parlament.
Po kërkoj në faqen zyrtare të Ministrisë së Arsimit për të gjetur një dokument të plotë e të qartë me arsyet dhe argumentet e këtij vendimi.
Për çfarë shkeljesh bëhet fjalë? Nuk po i gjej askund.
Pedagogët e Universitetit të Tiranës meritojnë ta kenë këtë transparencë. Qeveria është e detyruar ta bëjë. Përndryshe, unë do të jem e para që këto akte do t’i konsideroj si pjesë të planit okult të rilindjes për të përçarë e goditur Universitetin e Tiranës. Plan i përpiluar nëpër rreshtat ogurzeza të kapitullit XII të Ligjit aktual për Arsimin e Lartë”, thekson Mimoza Hafizi.
