Policia Rrugore ka shënuar me të zezë qershorin si muajin ku ndodhën më shumë aksidente automobilistike, duke u marrë jetën 26 personave.
Shkaqet janë disa, duke nisur që nga infrastruktura, mungesa e ndriçimit në disa akse rrugore, pakujdesia e vetë kalimtarëve, por edhe nga shpejtësia e drejtimit të makinës apo përdorimi i alkoolit dhe celularit në timon. Askush më shumë se familjarët e atyre që kanë humbur jetën në aksidentet automobilistike, nuk e di rëndësinë e respektimit të rregullave të qarkullimit rrugor.
Për këtë arsye, disa vite më parë, në Ditën Botërore të Përkujtimit të Viktimave të Trafikut Rrugor, Ministria e Brendshme dhe Policia e Shtetit vendosën që sensibilizimi i drejtuesve të mjeteve të bëhej përmes të afërmve të viktimave. Në disa zona, të konsideruara si “njollat e zeza”, Policia rindërtoi skena aksidentesh, me makinat reale të disa prej personave që kanë humbur jetën.
Ndërsa pranë këtyre vendeve të rrethuara me shiritin e Policisë ishin vendosur tabela sensibilizuese, që në disa raste tregonin shkaqet e aksidentit, e në disa të tjera citime të familjarëve të viktimave. Megjithatë, duket se gjithçka u harrua shumë shpejt. Aksidentet vijuan të sjellin viktima.
AKSIDENTET
Gjatë muajve shtator-tetor rezulton të kenë humbur jetën në aksidente automobilistike 39 persona, 14 më shumë se një vit më parë. Nga data 1 deri më 26 tetor të këtij viti, kanë ndodhur 19 aksidente me pasojë vdekjen, ose 3 viktima më shumë, sesa tetori i vitit të kaluar. Aksidentet me pasojë vdekjen kanë shënuar rritje, edhe pse masat ndëshkuese nga efektivët e Policisë Rrugore ishin të ashpra, që nga pezullimi i lejes së drejtimit e deri tek arrestimi i tyre, kryesisht për rastet e alkoolit.
Edhe gjatë muajit shtator, numri i aksidenteve me pasoja të rënda ka qenë i lartë. Konkretisht, rezulton të kenë humbur jetën 20 persona, në një kohë që shtatorin e vitit të kaluar, pati 9 viktima. Shumica e aksidenteve të rënda ndodhin në tri autostradat kryesore, Tiranë-Elbasan, Tiranë-Durrës dhe DurrësKukës. Sipas statistikave, rezulton që nga muaji janar deri në fund të shtatorit kanë humbur jetën në aksidente automobilistike 157 persona, 5 më shumë se e njëjta periudhë e vitit të kaluar.
Sipas specialistëve të Policisë Rrugore, një pjesë e aksidenteve, ku viktima janë këmbësorët, ndodhin për shkak se vetë ata nuk sigurohen para se të kalojnë rrugën. Por rezulton që gjatë dy muajve të fundit, mbi 80 për qind e aksidenteve kanë ndodhur për shkak të drejtuesve të automjeteve.
POLICIA: DO PËRDORIM TË GJITHA FORMAT PËR PARANDALIMIN E AKSIDENTEVE
“Respekto rregullat e qarkullimit rrugor, për të arritur i sigurt në destinacion”, ky ishte mesazhi sensibilizues që shpërndau dje Policia e Shtetit. Por nga ana tjetër premtoi se do të përdorë të gjitha format dhe mënyrat e kontrollit për të parandaluar aksidentet.
Policia tha dje se përgjatë 24 orëve të fundit, në të gjithë vendin, Policia Rrugore duke përdorur mjete dhe punonjës civilë e të uniformuar, ka konstatuar në të gjithë vendin qindra shkelje nga më të lehtat e deri tek ato që janë rrezik potencial për jetën e përdoruesve të rrugës, nga të cilat 432 masa administrative vetëm për parakalime të gabuara në të gjitha akset rrugore të vendit.
“Policia Rrugore do të përdorë të gjitha format, mënyrat e kontrollit dhe menaxhimit të trafikut rrugor, me qëllim parandalimin e aksidenteve rrugore dhe rritjen e parametrave të sigurisë në rrugë”, njoftoi dje Policia. Ndërsa shtoi se nisur dhe nga aksidentet e fundit, këshillon të gjithë përdoruesit e mjeteve dhe motomjeteve, çiklistët dhe këmbësorët, të tregojnë më shumë kujdes gjatë lëvizjes, të respektojnë rregullat e qarkullimit rrugor, të denoncojnë në numrin 112 e në Komisariatin Dixhital çdo shkelje të Kodit Rrugor.
PANORAMA