Një nga gjashtë kandidatët për t’u zgjedhur kryeministër i Kosovës, Albin Kurti, kreu i Lëvizjes Vetëvendosje, ka premtuar ndryshime të mëdha që sipas tij do të konkretizohen në vend me të mbërritur në pushtet forca politike që drejton.
Në një postim në llogarinë e tij zyrtare në “Facebook”, Kurti ka ndarë me ndjekësit një video, ku shprehet se “për të ecur përpara shteti i Kosovës ka nevojë për një frymëzim të ri”.
“Shteti ynë ka nevojë për frymëzim si atë që e patëm pas luftës kur u çliruam apo si frymëzimi që u krijua pas shpalljes së pavarësisë.Ky frymëzim i tretë do të vie vetëm me ndryshime të mëdha. Ndryshimet e mëdha vijnë vetëm me fitoren bindëse të Vetëvendosjes”, thotë Kurti.
Krahas Kurtit, pjesë e garës për të marrë drejtimin e qeverisë së re janë edhe: Vjosa Osmani, kandidate nga radhët e LDK-së; Fatmir Limaj, kreu i Nismës për Kosovën; Kadri Veseli, lider i PDK-së; Ramush Haradinaj, drejtuesi i AAK-së, si edhe Nenad Rashiq, i propozuar nga koalicioni -Sloboda- ( Liria).
Në këto zgjedhje të parakoshme në Kosovë, që ndjekin dorëheqjen e ish-kryeministrit Ramush Haradinaj, do të garojnë 25 subjekte politike/koalicione parazgjedhore. Numri i qytetarëve të cilët kanë të drejtë vote në zgjedhjet e 6 tetorit, është 1,937,868.
Që nga shpallja e datës së zgjedhjeve, krahas përgatitjeve teknike, kanë filluar edhe thirrjet për një proces të lirë e demokratik dhe shmangien e parregullsive. Bashkimi Evropian ka vendosur një mision prej rreth 100 vëzhguesish, të cilëve do t’u bashkohen edhe diplomatët euro-perëndimorë të akredituar në Prishtinë.
Për të garantuar mbarëvajtjen e procesit zgjedhor, Policia e Kosovës ka bërë me dije se po punon me mekanizma të tjerë, duke bashkërenduar planet e përbashkëta të veprimit për të siguruar një mjedis të qetë në ditën e zgjedhjeve.
Këto zgjedhje shihen të rëndësishme për Kosovën për shkak të sfidave me të cilat pritet të përballet qeveria e re, posaçërisht lidhur me çështjen e tarifës 100 % ndaj mallrave serbe dhe për rivendosjen e dialogut me Serbinë, në funksion të normalizimit të marrëdhënieve ndërmjet dy vendeve, që është edhe kusht për integrimin evropian të tyre.
