Pas raportit të DASH për vendin tonë, që e klasifikonte Shqipërinë si vend tranzit të dogave të forta dhe bazë e krimit, e pas akuzave të forta të opozitës, flet në emër të qeverisë, Ministri në Detyrë për Evropën dhe Punët e Jashtme, Gent Cakaj.
Sipas tij, raporti është një pasqyre realiste, por edhe inkurajim i madh për reformat e qeverisë.
“Kemi rritje të bashkëpunimit ndërkombëtar, raporti thekson faktin se vendi ka arritur rezultate thelbësore në luftën kundër narkotikëve dhe krimit të organizuar për shkak të përpjekjeve për integrim në BE. Nuk kemi të bëjmë me mospërmbushje të detyrave, por angazhim e përparim drejt axhendës evropiane. Raporti afirmon se përkundër sfidave dhe vështirësive të shumta, Shqipëria është në moment pozitiv për rezultatet e marra në reformën në drejtësi, pra konfirmon se angazhimi i institucioneve të vendit në situatën aktuale nuk është zgjatim i tranzicionit disa dekadash”-tha ai.
Sipas Cakaj, “Në vendet e rajonit shqetësimet janë më të thella sesa për vendin tonë. Një gjuhë e ngjashme në raportet për të drejtat themelore të DASh janë edhe për vendet e BE. Kjo nuk do të thotë se po gjejmë alibi, por se trashëgimitë historike janë esenciale për të kuptuar fenomenin. Shqipëria ndryshe nuk bëhet brenda ditës. Kemi shembujt e rajonit që janë në negocim kritikohen me tone më të ashpra se kaq, edhe për shkak të paaftësisë për të adresuar problemet”.
Me tej, ai thekson se “Raporti nuk është konstatim krize, por identifikim momentumi pozitiv dhe trendeve në rritje. Duhet theksuar se si mbyllet raporti, me mbështetjen e SHBA”
