Provojeni në zgjedhje! Ja kaq e thjeshtë është!

Po, ka një zgjidhje. Meqë partitë politike nuk e gjetën. Cojani çështjen sovranit, pra qytetarëve, të cilëve të gjitha palët shprehen se i shërbejnë!

E ndan sovrani pa merak fare!

Zgjedhjet e lira, të ndershme, të barabarta, të drejtpërdrejta, ku populli të japi verdiktin e tij për deputetët, jo për listat e kryetarëve, duke e ndarë shapin nga sheqeri!

Zgjedhje të lira ku grupet dhe partitë politike, kandidaturat e pavarura, të kandidojnë duke u nisur nga pozita të barabarta, nën një ekzekutiv asnjanës dhe administratë që të mos fusi turinjtë në kutitë e votimit!.

Ka mundësira pa fund për t’a realizuar këtë!

Ne nuk jemi të hurit dhe të zjarrit!

Mos na vini në zgjedhjen midis koktailit molotov dhe gazit lotësjellës! Sepse gazi lotësjellës prodhon koktailin molotov kurse koktaili molotov prodhon gazin lotësjellës!

Intelektualët, teknicienët, menaxherët, studentët, kërkuesit shkencor, të gjithë qytetarët, kam sigurinë e brendshme dhe provat, janë për paqen, jo për dhunën, as për kanabisin, as për korrupsionin, as për grabitjen e votës, as për institucione që sillen sikur të ishin kështjella kafkajane.

Sindromi i Robinson Kruzos po vërtitet nëpër Atdhe! Simboli i vetmisë! Vetëm përpara popujve të qytetëruar. Qytetari vetëm përballë pushteteve! Politika vetëm përballë qytetarëve! Pushteti vetëm përballë shoqërisë!

Eshtë më i dëmshmi!

Cfarë i gjeti grekët që bënin zgjedhje cdo gjashtë muaj kur vendi ishte në krizë, dhe e gjetën daljen?

Cfarë i gjeti Italianët që pas Luftës të Dytë botërore hynin në zgjedhje sa herë hija e krizës dukej në horizont?

Cfarë i gjen zvicerianët që hyjnë në referendume sa herë ka drama që duhen zgjidhur?

Asgjë!

Zgjedhjet e lira kanë shumë herë më pak kosto sesa dhuna nëpër rrugë!

Të gjithë thonë se kanë mbështetjen e popullit. Atëhere logjika minimaliste e teknicienit, intelektualit, kërkuesit shkencor thërret :

Provojeni në zgjedhje!

Ja kaq e thjeshtë është!